Звукот на три континенти на ОФФ-Фест 2015

BassekouKouyateNgoniBa

Се ближи Офф-Фест, фестивалот кој секоја година во Скопје носи бран од бои, шаренило и звуци. И годинава организаторите подготвија егзотично „мени“ кое со сигурност ќе им се допадне на љубителите на изворната музика на земјите ширум светот.

Програмата на годинашното 14-то издание е распоредена во пет богати фестивалски вечери на кои ќе настапат седум музички групи и изведувачи од три светски континенти. Офф-Фест, кој во организација на Скопскиот џез фестивал ќе се одржи од 28 мај до 1 јуни ќе ги пренесе звуците и магијата на Мали, Мароко, Јужна Кореја, Португалија и Македонија.

Музичката култура на Мали во фокус на Офф-фест 2015

Мали со својата богата музичка традиција е во фокусот на годинашното издание на фестивалот, во чии рамки ќе настапат три извонредни музички состави од овој регион на Западна Африка.  На првиот фестивалски ден (28 мај), публиката ќе ужива во настапот на Басеку Кујате, мајсторот на традиционалниот инструмент нгонии неговиот еклектичен состав Ngoni Ba, кои ќе го претстават материјалот од својот најнов албум „Ba Power”. Bassekou Kouyate & Ngoni Ba последниве години важат за највозбудливиот бенд кој доаѓа од Африканскиот континент. Музичката приказна за Мали ќе продолжи веќе следната вечер (29 мај), кога вљубениците во добриот звук ќе имаат можност да го проследат концертот на легендарниот блуз гитарист и симболот на независноста на Мали – Бубакар Траоре. Последниот фестивалски ден (1 јуни) е резервиран за концертот на светската музичка сензација – виртуозните музички бунтовници Tinariwen.

Јужна Кореја, Мароко, Португалија и Македонија

Офф-фест на 28 мај (четврток) ќе започне со концертот на иновативниот пост-рок/ворлд-мјузик состав и во моментов најголемата музичка атракција од Кореја, бендот Jambinai. На 30 мај (сабота) публиката ќе патува низ магијата на фадо музиката на португалката Лула Пена и ќе ужива во концертот на популарната мароканска пејачка и кантавторка Хинди Захра, која во Скопје ќе го изведе својот најнов албум „Homeland”. Македонската етно ризница ќе биде претставена на концертот на групата Chalgia Sound System, кој ќе се одржи за 31 мај (недела).

Сите концерти на Офф-фест оваа година ќе се одржуваат во Младинскиот културен центар (Кино Фросина и Дансинг сала)

Во рамките на фестивалот ќе бидат прикажани и два музички документарни филмови – „Ќе пејам за тебе” („Je chanterai pour toi”), приказна за легендата Бубакар Траоре и  филмот „Последната песна пред војната“(„The Last Song Before the War”), документарец посветен на „Фестивалот во пустината“ во Мали.

Влезниците за Oфф-фест ќе бидат пуштени во продажба на 28. април (четврток) на продажните места на Југотон Рекордс, МКЦ и онлајн на www.mktickets.mk.

11070174_794738323937212_913997831610939253_n

Leave a Reply

Your email address will not be published. Required fields are marked *